پاکستان کی وفاقی حکومت نے ملک میں جاری جزوی لاک ڈاؤن میں دو ہفتے کی توسیع کردی

وزیراعظم عمران خان کورونا کے پھیلائو کے خدشے کے پیش نظر جاری لاک ڈاؤن میں توسیع کااعلان  کردیا، انہوں نے کہا کہ  لاک ڈاؤن کوآگےلےکرجارہےہیں،اگلے2 ہفتے تک لاک ڈاؤن برقراررہےگا۔

قومی رابطہ کمیٹی کے اجلاس کے بعد میڈیا سے گفتگو کرتے ہوئے  وزیراعظم نے کہاکہ حکومت کو لاک ڈاؤن کی وجہ سے ہونے والی مشکلات کا احساس ہے لیکن جزوی لاک ڈائون مزید دو ہفتے جاری رہے گا۔ان کا کہنا تھاکہ ساری دنیا میں لاک ڈاؤن ہوچکے ہیں،ہم نے بھی لوگوں کو محفوظ رکھنے کےلیے لاک ڈاؤن کیا ،مجھے سب سےزیادہ فکردہاڑی دارطبقےکی تھی۔

انہوں نے بتایا کہ کنسٹرکشن انڈسٹری کو کھول رہے ہیں اور اسے پیکج بھی دیں گے ۔ وزیراعظم نے کہا کہ بیرون ملک پھنسے پاکستانیوں کے مسئلے پر بھی آپس میں بات چیت کرتے رہے، شروع میں کورونا باہر سے آئی اور صوبوں میں خوف ہے کہ تیاری کے بغیر بیرون ملک مقیم افراد کو آنے دیا اور ٹیسٹنگ یا قرنطینہ کی سہولت نہ ہوئی تو تیزی سے پھیل جائے گا، لیکن کیونکہ وہ بھی پاکستانی ہیں تو ہم نے فیصلہ کیا ہے کہ کس کس طرح واپس لائیں گے ۔ 

انہوں نے بتایاکہ رمضان کی آمد آمد ہے اور لوگوں کی خواہش ہوتی ہے کہ رمضان میں عبادات کریں اور تراویح وغیرہ کی ادائیگی کریں لیکن ساتھ ہی ساتھ ہمیں اپنی حفاظت بھی کرنی ہیں، مختلف مکتبہ فکر کے علما کو بلا کر ان سے مشاورت کی جائے گی ۔